-->

كيفية الإستمتاع برحلتك في الغردقة













الغردقة الـ مايعرفهاش.. متضيعش دقيقه فى رحلتك للغردقة

==============
لو افترضنا إن فيه شلة صُحاب ،قررت تسافر الغردقة
بس معهُمش عربية، ولا حاجزين فى أوتيل
ولا يعرفوا أى حاجة خالص.

بالنسبة للـ”سوبر جيت” هتلاقى كذا شركة زى “Hi jet”
ودى فروعها فى شارع النصر ،أمام نادى السكة
القُللى ورا قسم الأزبكية ،وموقف أحمد حلمى جنب محطة مصر
وأسعاره بين 65 ج و95 ج
ورحلاته من 8 الصبح لحد 2:30 الصبح. فيه كمان “Go bus”
وده فروعه فى شارع النصر أمام نادى السكة وفى عبد المنعم رياض
جنب هيلتون رمسيس،وأسعاره بين 45 ج و 100ج
ورحلاته من 7:30 الصبح لحد 3:30 الصبح.

.
بعد أختيارالرحلة والتحرك، أصعب كمين ممكن تقابله
عند بوابات وصول العين السُخنة ،
والتانى عند بوابات الغردقة

قبل الجونة بمسافة قليلة، نصيحة يعنى لو شك فيك هتطلع حبة حلوين ،
عشان الأمن والظروف الأمنية ،وخصوصاً لو طالع بالليل.

.
بعد ما توصل لو مش معاك عربية،
مفيش أكتر من سواقين التاكسى ،ومعظمهم قِناوية،
والأجرة بين 10 ج و20 ج و30 ج
حسب المكان إللى إنت رايحه و لو السواق ضايقك
هتلاقى على ضهر كل تاكسى رقم للشكاوى،
بس متنساش تلقط رقمه.

.
فى الغردقة هتلاقى أماكن كتير جداً ممكن تأجر منها شقق،
فى أحياء مبارك من 1 لـ 5 ودى لطيفة وأسعارها كويسه،
فيه كمان شقق نضيفة بس غالية شوية عند “قرية الذهبية،
لو أجرت فى شارع seagull هتبقى فى مكان مميز أوى
لإن ده زى وسط البلد،
فيه كل حاجة وأحلى قعدات وكافيهات وPubs.
فيه كمان أوتيلات صغيرة وكويسة زى
Elysees Hotel & Dream beach.

.
نبدأ رحلتنا الموفقة بالبحر والأنتخة بعد ما تنٌط فى المايوه،
فى أول طريق الشيراتون القديم هتلاقى
كذا private beach وأسعارهم بين 50 ج و 100 ج حسب الموسم،
أولهم Elysees Hotel & Dream beach
وبعده بشويه هتلاقى الـ white beach
بس دول مش بيدَخَلوا غير عائلات أو couples
ممكن كمان تروح الـ Aquarium
وتتفرج على أهم الأسماك الموجودة فى البحر الأحمر
،وده بيكون مفيد جداً قبل الـsnorkeling والـDiving
عشان تعرف إيه الأنواع الخطر والمسمومة
أحلى الأكلات والوجبات
=================


بالنسبة للأكل وأنت خارج من الـMarina
أمشى شوية فى اتجاه الجامع الكبير إللى هتشوفه أمامك
هتلاقى حلقة السمك، عالم تانى للى بيحبوا الأكل،
أشهر أنواع “لو نويت تديها فوسفور
الكاليمارى المشوى وده تجربة فى حد ذاته،
ونوع تانى اسمه الناجِل
وده عبارة عن سمكة كبيرة شوية وطعمها طعم الكابوريا.
لو مبتفهمش فى الأنواع أوى بلاش تجيب سمكة “أم الشعور
عشان دى كذا نوع أحلى واحد فيهم اسمه “شعور حُر
بس البياعين بيبيعوا نوع تانى وبيضحكوا بيه على الزباين
ولو غاوى ألوان يبقى هات سمك البربون
وهو”نوع من أنواع سمكة البغبغان”.
معظم الأنواع دى بتتعمل صوانى، لو حظك حلو
ممكن تتكعبل فى حد بيبيع ستاكوزا طازة،


ولو أنت من عُشاق الأماكن إللى بتعبر عن البلد
احلى شوربة “sea food” بتعملها مطاعم السمك الشعبية
إللى عند المينا فى نفس المنطقة.
اما بقى لو ملكش فى السمك أوى،

إنزل شارع ،
”seagull”
وادخل من جنب “Metro” يمين فى يمين،
واسأل عن مطعم “البيت بيتك
ولو عايز تعمل نمرة قول “ مطعم الحاجه
لإنه معروف بالاسم ده فى الغردقة،
المطعم ده من أحلى مطاعم الأكل البيتى
و لطواجن والمشاوى حاجة كده زى البرنس وأم حسن
نصيحة لو عايز تلحق الكبدة و الطواجن التقيلة
روح قبل 7 بالليل لإن هناك بيعملوا الأصناف فى نفس اليوم
وإللى يخلص مبيتعملش تانى.


بالنسبة للى بيموتوا فى الأكل الشعبى والسندوتشات
جاد” إللى فى ميدان العروسة ممتاز وله فرع تانى عـ الممشى
وفي كمان خروجه فى شارع “شيرى” وسط أهل البلد
وجو قهاوى مصر ومحلات الفطير على كام سوبر ماركت
ومحلات موبايلات، بس فى آخر الشارع ده فيه “الفخرانى
يعنى أحلى رز بلبن وأم على وخِلافه مينفعش تروح الغردقة
ومتعديش على الفخرانى تِحَلى.

.
تخرج فين بالليل ؟

طيب بلبطنا وأكلنا.. نُخرج فين بالليل؟؟،
كتر الكلام فى الموضوع ده بص لو عيلة و فيها أعمار مختلفة
زي الاطفال الصغيرة من إللى بتنام على غفلة
أو ناس كبار زى جدو و تيته
يبقى تطلع على “Senzo Mall”
وده بعيد شويه لإنه فى طريق سفاجا حوالى 20 دقيقة بالعربية.
أجمل حاجة إنه فيه كل حاجة، محلات هدوم أعلى Brands
وكافيهات وSpineeys عشان فيه ناس بتموت فى العروض
وأنت راجِع خٌد طريق القرى عشان تاخد فكرة بردو
عشان لو حابِب تاخد Day use تبقى عارف الـ Hotels.
لو غاوى قعدات وكافيهات وكوتشينة ممكن تروح كذا مكان.
نبدأ بطريق الشيراتون القديم ويا سلام على الكافيهات إللى على البحر.
بعد ما تعدى فندق الـ Marriot هتلاقى مجموعة كافيهات كويسة وهادية
زى “ Zooka ” مثلاً وده أفضلهم فى الخدمة.


لو مشيت أدام شوية هتلاقى Granada Restaurant & Pub
وده قعدته فعلاً حلوة وأكله كويس جداً.
فيه ناس بتموت فى الزحمة والهيصة دول أنصحهم بالكافيهات
إللى فى شارع “seagull” اللى بيتمد من ميدان العروسة
لغاية طريق الهضبة ومش هينفع أحدد كافيه معين
لإن عددهم كبير جداً. فيه كمان قعدات هادية فى الـ Marina
ودول أحسن تروحهم مع صاحبتك أو خطيبتك أو المدام
لإن هناك الجو رومانسى شويه وأدامك اليخوت مترصصة
والجو شاعرى على الآخر.
الشارع إللى أدام الـ Marina متمشيش فيه لوحدك بالليل
عشان قلق شوية وحاول ما تحُكِش فى حد هناك
خصوصاً سواقين التاكسى إللى مفيش أكتر منهم فى الغردقة.
طبعاً لو معاك 25 جنيه وعايز تقعد فى حتة إنزل ناحية ميدان الدهار
أو شارع شيرى إللى فيها أهل البلد البسيطة والأسعار الرمزية
بس متعملش هناك مشاكل عشان ميعملوش معاك الجولاشة.


فيه كافيهات فى طريق الهضبة وعند أول كافيه بعد الميناء بشويه
الغردقة فعلاً جميلة فيها كل حاجة ولإن إحنا إتكلمنا على البلد
كل إللى فات ده حاجة و الـHotels والـ activities
إللى فيها حاجة تانية زى الـDiving والـSnorkeling
واليوم إللى ممكن تقضيه فى جزيرة الجفتون،
دى بتكون رحلات يومية بتتضمن Snorkeling
فى كذا منطقةعلى المركب. و فيه كمان السفارى
بأسعار مختلفة على حسب طالع Beach buggies ولا عربية
على حسب الأماكن البدوية إللى هتوصل ليها،
فى الغردقة سهرات، أكل، صحرا، و بحر.. يعنى فعلاً هتتبسط

ليست هناك تعليقات:

إرسال تعليق