-->

لية تسافر دهب ... 11 سبب يخليك تسافر دهب



12 سبب يخليك تسافر( Dahab )

 -1  سهولة الانتقالات
من محطة غرب الدلتا في رمسيس او محطة الترجمان في اتوبيسات بتطلع يوميا الساعة 12 الظهر و الساعة 7 و الساعة 9 مساءا و الساعة 12 و نص بليل .. ب 200 جنيه ذهاب و عودة.. الطريق من القاهرة الي دهب تقريبا 12 ساعة
-2 الاقامة
متوسط سعر الليلة في فندق او هوستيل 200 جنيه في اقل و في اغلي طبعا .. احنا نزلنا في فندق اسمه Sea Horse سعر الليلة في غرفة مزدوجة 120 جنيه يعني الفرد ب 60 جنيه في الليلة (الغرفة فيها تكييف و حمام خاص و تلاجة و تلفزيون) و في واي فاي مجانا .. الافضل الاقامة في منطقة المشربة لانها قلب مدينة دهب .. تقدر تحجزوا في اي فندق او هوستيل عن طريق موقع Www.booking.com
-3  الانتقالات داخل دهب
ممكن تركبوا جمل او عربية نص نقل و بتركبوا في الصندوق او العربية التناية ال7 راكب اغلب المشاوير ب 20 جنيه و ممكن تفاصل او في طريقة انا بحبها بتأجروا عجلة ب 50 جنيه في اليوم بتروح بيها كل مشاويرك
-4  الاكل
هنا في دهب في كل المطاعم اللي تتخيلها من اول الفول و الطعمية الي مطاعم الاكل الصيني و الاسعار رخيصة جدا او نفس اسعار القاهرة
-5  الناس في دهب
سكان دهب الاصليين ودول مفيش اطيب و اكرم منهم و اجانب من جنسيات متعددة و مصريين من محافظات تانية وكله هنا في حاله محدش ليه دعوة بحد
-6  البساطة
مدينة دهب و الناس اللي فيها اكتر حاجة بتميزهم هي البساطة يعني لو حابب تعرضها بالفورمة او بالكلب الالماني بتاعك او بماركة ملابسك المستوردة فمكانك مش في دهب خالص
-7  الراحة النفسية
مستحيل تيجي دهب و نفسيتك متبقاش مستريحة ده القطة او الكلب هنا نفسيته افضل من نفسية سكان القاهرة مجتمعين


-8  ليه دهب اصلا
جمال الطبيعة زي الجبال و البحر اللي زي المالديف و يمكن احسن كمان والله و الشجر اللي بيطلع في وسط الصحرا .. دهب من الاماكن الطبيعية القليلة في العالم اللي الانسان ايده لم تمسها
-9  الانشطة اللي ما لا نهاية لها في دهب
في دهب ممكن تخوض تجربة الغطس حتي لو مبتعرفش تعوم في مراكز غطس للمبتدءين في الثري بولز او اللايت هاوس او الكانيون .. في دهب ممكن تركب غواصة وتتفرجوا من الزجاج علي السمك و الشعب المرجانية .. ممكن تروح شاطئ اللاجونا و تنزل البحيرة الكبريتية او تنزل اجمل بحر ممكن عينك تشوفه و تركبوا البنانة او البراشوت وكل ال Sea Sports هتلاقوها .. ممكن تطلع سفاري بالجمال او البيتش باجي او بعربيات الجيب في قلب الجبال و تحضر حفلات رقص بدوي في الليل .. ممكن تروح تعمل سنوركلينج في البلوهول (اجمل مكان فيه شعب مرجانية في العالم كله) ولو انت غطاس و معاك شهادات ممكن تستمتع بالغطس في البلوهول مقبرة الغطاسين ..ممكن تركب عجل .. ممكن تروح زيارة الي محمية راس محمد او محمية ابو جالوم و عمل سنوركلينج و مشاهدة الاسماك النادرة .. ممكن تطلع رحلة في عرض البحر باليخت و عمل سنوركلينج و غداء و عشاء و حفلة رقص طول اليوم كل ده ب 150 جنيه و ممكن تفاصل كمان .. ممكن تطلع رحلة ب 100 جنيه لزيارة جبل سانت كاترين و جبل موسي .. و ..... الخ انشطة محتاجة شهر عشان تخلصها كلها
-10  لا لشركات السياحة
كل ده مش محتاج تعمله عن طريق شركة سياحة لانها بتعمل اللي انت مكسل تعمله و تاخد منك سمسرة .. وفر فلوسك و سافر و استمتع بيها
11 - EveryDay Cafee
لاااااااازم لما تيجي دهب تقعد في الكافيه ده حاجة خيال وهتلاقي مزيكا جميلة و قاعدة علي البحر وبليل بيلعبوا درامز و كمانجة و جيتار حاجة جميلة خاااااالص

ليست هناك تعليقات:

إرسال تعليق